të rinjtë kanë nevojë të ndihmohen dhe të udhëhiqen nga edukatorë të përgjegjshëm

Si drejtor i Institutit, dhe si prind i dy fëmijëve, e kuptoj rëndësinë e gjetjes së një shkolle që do të plotësojë kërkesat intelektuale, fizike dhe emocionale të fëmijës tuaj. Kam parasysh se po jetojmë në erën e ndryshimeve befasuese, në erën e informacionit, shpesh të shumëfishuar dhe të çorganizuar, në kontekstin e komunikimit global nëpërmjet internetit. Bota jonë, kurrë nuk ka qenë kaq e pasur me mundësi, por dhe me rreziqe, sa ç’është në fillimin e këtij shekulli. Më shumë se kurdoherë, sidomos në moshën e adoleshencës, të rinj kanë nevojë të ndihmohen dhe të udhëhiqen nga edukatorë të përgjegjshëm. Si edukatorë në një Institut prestigjioz, ne kemi zgjedhur të jemi jo vetëm mësues, por dhe drejtues të nxënësve tanë. Shqetësimi ynë parësor është formimi i karakterit, po aq sa dhe zhvillimi i një kurrikuli sfidues dhe interesant. Nëpërmjet pjesëmarrjes në të gjithë veprimtaritë shkencore, sportive dhe artistike, si dhe gjatë qëndrimit në konviktin tonë, willsonasit zbulojnë pikat e tyre të forta dhe zhvillojnë më tej shkathtësitë dhe aftësinë për të marrë vendime të drejta moralisht, në mënyrë të pavarur dhe mbi bazën e informacionit përkatës.

Ne krenohemi për rrugët e larmishme që ndjekin pas përfundimit të instituti nxënësit tanë. Ne shpresojmë se kur ata të lenë Institutin të jenë të gatshëm për të jetuar siç dëshirojnë. Ëndrra jonë është që willsonasit tanë, kudo që të jenë, të kontribuojnë me sukses për ta shndërruar erën e informacionit në erën e dijes.

    Dilaver KOCIU

  Drejtor i Institutit Arsimor Wilson