Jeta e përbashkët, sfidat,  mundësitë dhe veprimtaritë sportive:  këto janë fjalët që përdorin wilsonasit për të përshkruar jetën në Institut. Ata, gjithashtu, bisedojnë rregullisht se si mund të forcojnë çdo ditë miqësitë me njëri tjetrin.

Jeta në Institutin tonë fillon mëngjesin e të hënës, me ceremoninë e ngritjes së flamurit nën ritmin e Himnit kombëtar, dhe përfundon të premten, zakonisht me veprimtari sportive. Dita mësimore për studentët e shkollës së mesme fillon në orën 8:00 dhe përfundon në orën 14:30; ndërsa për nxënësit e shkollës 9-vjeçare mësimet fillojnë në orën 9:00 dhe përfundojnë në 15:15.

Në mesin e ditës mësimore nxënësit marrin drekën, pas të cilës vijojnë edhe 1 ose 2 orë të tjera mësimi. Nxënësit e shkollës 9_vjeçare kanë një kohe të caktuar në dispozicion për të plotësuar disa nga detyrat për ditën e nesërme. Në ditë të caktuara, sipas kalendarit, nxënësit zhvillojnë veprimtari sportive ndërmjet tyre ose me nxënës të shkollave të tjera. Gjithashtu, nxënësit mund të përfitojnë nga kapacitetet e amfiteatrit për të parë koncerte, filma ose projeksione të ndryshme. Në stinën e verës, pishina e instituti pret garues nga klasa të ndryshme që zhvillojnë kampionatin e notit ndërmjet klasave.